點解要改名?


「跳格」曾經將名字由「舞蹈錄像節」改為「舞蹈影像節」, 呢次又將英文名由 dance video 改成movement-image。Movement-image 係受到 moving images (流動影像)嘅啟發,後者涵蓋好多唔同種類嘅視藝作品,但各作品嘅共通點就係必須呈現動態。


大多數人嘅舞蹈經驗係從觀看開始,經過大腦神經,激發身體感知,人就想手舞足蹈。我認為,只要可以令人嘅心、身想郁嘅嘢,就係舞蹈。同一道理,唔係所有嘅流動影像都係舞蹈影像,只有能夠喺觀看者嘅身體上發揮作用嘅視覺作品,先至係舞蹈影像,無論佢係唔係通過身體來呈現。


因為疫情,觀眾嘅觀看經驗已經好唔同。影像呈現嘅手段同方式發展迅速。咁舞蹈呢?舞蹈影像又可以帶啲乜嘢畀我哋呢?


我哋喺 movement 同 image 之間加上 hyphen(連接號),係希望兩者重回一個相互啟發嘅位置,而唔係只由一方去主宰。


俗語話:「行不改名,坐不改姓。」但係呢一句話對當代藝術嚟講似乎並唔適用,今次我哋改名係為咗表達我哋呢一刻嘅想法,但係我哋非常樂意睇到未來有人願意繼續更新。


伍宇烈
CCDC 藝術總監